Radosnych świōnt, szmaciŏrzu

betlyjkaJak idziesz do kościoła, to zawdy, ale to zawdy pamiyntej, coby sie szykownie ôblyc. A zebier ku tymu mobilniŏk, zdrzadlōnka, a inksze droge harapucie do aszyniŏ.

Betlyjki u francmŏnōw w Panewnikach skludzajōm do sia moc ludzi, nŏjwiyncyj we niydzielã. Byzucher za byzucherym cisnōm ôd ołtŏrza w bazylice, bez izbã z ruchomōm betlyjkōm i małymi betlyjkami z roztomajtych strōn, aże do „żywyj” betlyjki, w kerej idzie trefić yjzla, cigi a kucyka. Niyrŏz trza swoje doczkać: przi dźwiyrzach, coby wlyź rajn, abo kajś ze zadku, coby znojś sie plac zarŏz przi gelyndrze i akuratnie wszysko ôboczyć.

We Nowy Rok my tak stali – moja kobiyta, dziołszka i jŏ – aże nŏs prasła świōnteczno scyna:

Jedna familijŏ stała sie przi istnym yjzlu i robiōła bildy. Trochã nŏm sie mierzło, bo ludzi bōło naprŏwda ôd pierōna, a ci durś cykajōm. Ze zadku ciśli sie na nŏs nŏstympni, tōż ôrŏz moja ślubnŏ sie zaszterowała i pedziała trochã do mie, trochã do dziołchy, kero trzimała zdrzadlōnka:

– Wiela idzie robić zdjyncia w takij tulmie?! Inksi ludzie tyż chcōm sie ôboczyć betlyjkã!

Kobiyta wejrzała na nia, wykrziwiła gymba i ciepła:

– Jak kiedyś będzie panią stać na aparat, to też będzie sobie pani mogła porobić zdjęcia.

Dave Chapelle pado we stand-upie „Killin’ Them Softly”: „Mieliżeście kejś tako sytuacyjo, iże cosik bōło take rasistowski, iże wŏs ani niy zeszterowało? Żeście ani niy poradzili uwierzić? Jakby to bōł jaki popieprzony film?”. Sam niy bōło rasizmu, ino spōntanicznŏ, bezinteresownŏ, zimnŏ złość.

Piyrw nŏs sztopło, niskorzij zaczlimy sie śmiŏć, i to tak festelnie, iże poradzilimy ino wylyź na plac, bo sie na nŏs wszyscy ôglōndali. Żŏl, że naszŏ zdrzadlōnka ôstała w dōma! Niy pomyślelimy, co przidzie ji robić za symbol statusu społecznygo.

(kōniec piyrszyj tajli )

Reklamy

Ôstŏw kōmyntŏrz

Wprowadź swoje dane lub kliknij jedną z tych ikon, aby się zalogować:

Logo WordPress.com

Komentujesz korzystając z konta WordPress.com. Wyloguj / Zmień )

Zdjęcie z Twittera

Komentujesz korzystając z konta Twitter. Wyloguj / Zmień )

Zdjęcie na Facebooku

Komentujesz korzystając z konta Facebook. Wyloguj / Zmień )

Zdjęcie na Google+

Komentujesz korzystając z konta Google+. Wyloguj / Zmień )

Connecting to %s