Roy Scheider z lamusa

Ôboczyłech niydŏwno „Szczynki 2”. Film sie fest zestarzŏł, niy ino skuli efektōw szpecjalnych, mody abo jakości. Znodech sam piykno scyna, kerom pomału bydzie trza tuplikować, jak dzisio, po jakimu kejś szofer musiŏł przōd kurblować, zaczym sztartnył auto. Film je z 1978 roku – 34 lata i wiela sie nŏm pomiyniło.

Martin Brody znod fotografkastla. Chcioł ôboczyć bildy, nale przōd musioł wywołać film. Scyna trzimie w napiyńciu: cima, dwōch chopōw tonko papiōr, pomału pokazowo sie fotografijo. Rychtyk! Majōm kōnsek rekina!

Dzisiŏ bezma nikt tak niy robi bildōw. We cŏłkich Gliwicach ôstoł sie ino jedyn fotograf, kery trzimie sie metody tradycyjnyj – wiela ich bydzie w policyje w USA? Fotografkastle sōm cyfrowe, bildy naprzōd w plikach – i tela!

Rozwōj technologije wyciepuje cŏłkie motywy fabularne na hasiok, abo do biksy z abcybildrym „retro”. Wierzã nojwiyncyj sam zabelōntoł mobilniok,  skuli kerego na przikłŏd kryminały muszōm dzisiŏ być blank inksze, jak dwajścia, trzydziści lot nazot.

Co trzaby zônaczyć, jakbymy sie brali za remake „Szczynkōw 2”? Przekludzilibymy scyna ze ciymnie ku macherŏwi ôd sprzyntu elektrōnicznygo. Ôn by wziōn karta pamiynci, wraził do czytnika i możno trochã sie narobił przi ôdczytywaniu plikōw. Niyskorzi mielibymy bild na monitorze – szłoby sie pobawić photoshopym, coby był wyraźny. Bōłaby z tego scyna mnij podano na thriller, wiyncyj na CSI.

Chocioż… jakby ino jedyn bajtel wziōn mobilniōk na łōdka, cŏłki film niy miołby synsu. Przecã ô tym pado, iże niy wiadōmo: pływo zaś tam rekin, abo niy. Jedyn telefōn na 112 i fertich.

Postymp wciepnył „Szczynki” do kolekcyje „w starym kinie”, kajś tak kole inkszej fajnej gyszichty – „W 80 dni dookoła świata”. Tukej zaś wandrujōm i wandrujōm aże 80 dni, a przecã kŏżdy wiy, iże ziymia idzie ôkrōnżyć ani w jedyn dziyń, fligrym.

Reklamy

3 myśli na temat “Roy Scheider z lamusa

  1. Mŏsz recht. Nale to tyż i dojś mode filmy z 90. rokōw przełazōm do takij kategoryje. Dziocha lŏtŏ po mieście, uciyko przed mordercōm i szukŏ autōmatu telefōnicznego. A Ty bez kōncek sekundy pytŏsz sie sōm siebie: „To co, ôna niy mŏ mobilniŏka?” :)

  2. Jô tam filmōw niykej niy miołech rôd òglôndać, nale przaja ksiōnżkōm i tyż widzã, aże świat i ludzie sie zmiyniyli – nale na co inksze patrzā jak Ty. Mōm płaczki we ślypiach jak czytōm Puszkina abo Gonczarowa, kaj frelōm sie dôwało kusik w rynka i inakszy jak za dwoje sie niy gôdało – a terôz wyjzdrza za òkno i dziołchy same siebie niy majōm w zocy, na hulicach motyki, buzeranty a kokoty.
    Wolołbych wrōcić na XIX storocze.

  3. Piyrwyj bōło lepij? Chopie, niy wierz mitōm!
    Inkszŏ rzecz, iże w XIX storoczu bylibymy pruskimi bambrami-wasserpolokami, plebsym, a niy grofami abo oficyrami z ruskich rōmanów.

Ôstŏw kōmyntŏrz

Wprowadź swoje dane lub kliknij jedną z tych ikon, aby się zalogować:

Logo WordPress.com

Komentujesz korzystając z konta WordPress.com. Wyloguj / Zmień )

Zdjęcie z Twittera

Komentujesz korzystając z konta Twitter. Wyloguj / Zmień )

Facebook photo

Komentujesz korzystając z konta Facebook. Wyloguj / Zmień )

Google+ photo

Komentujesz korzystając z konta Google+. Wyloguj / Zmień )

Connecting to %s